Nga testet me rezolucion të lartë, u zbulua së fundi se disa prej linjave atërore shqiptare të haplogrupit J1 i takojnë degës BY94>Y177580. Sipas YFull, degëzimi i BY94 ka nisur në Epokën e Bronzit dhe ka vazhduar deri në Mesjetë. Bartës të BY94 gjenden në disa pjesë të Europës, por diversiteti më i lartë është në Mesdhe (sidomos Shqipëri, Greqi, Itali), ku duket se përhapur që në periudhën parahistorike. Diversiteti modern përputhet edhe me gjetjet nga eshtrat e lashta, pasi J-BY94 është zbuluar në eshtra të Epokës së Hekurit në Maqedoninë e sotshme juglindore, si dhe në Azinë e Vogël në periudhën romake dhe në Mesjetë.
Katër rezultate shqiptare me teste të thelluara gjenden në tri nëndegë të Y177580, me një paraardhës të përbashkët nga fillimi i Epokës së Hekurit, kurse një tjetër është J-BY94* (paralel me rezultatin e lashtë nga Maqedonia). Mes shqiptarëve, J-Y177580 është gjetur në Mat, Shijak, Vlorë, Kurvelesh dhe Leskovik. Nisur nga kjo shpërndarje, degët e J-Y177580 mund të jetë ndër linjat tona të lashta që vatrën e përhapjes e kishin kryesisht në trevat qendrore dhe jugore.
