Rezultatet e reja – 2020/1

Një ndër synimet kryesore të Projektit Rrënjët është ndërtimi i një kampioni gjenetik përfaqësues për popullin shqiptar. Suksesi i projektit drejt këtij synimi varet së pari nga pjesëmarrja vullnetare e shqiptarëve që testohen në kompani të ndryshme dhe mund t’i bashkojnë databazës sonë rezultatin e tyre. Prandaj, ftojmë çdo shqiptar që ka dëshirë të mësojë mbi prejardhjen e tij, të kryejë një test Y-DNA dhe të anëtarësohet në projektin tonë. Informacion rreth kompanive të testimit mund të gjeni këtu, si dhe mund të na kontaktoni drejtpërdrejt përmes emailit.

Rezultatet

Për shkak të kufizimit të lëvizjes, problemeve ekonomike, dhe një fryme hezituese të shkaktuar nga përhapja e COVID-19, rritja e kampionit ka qenë disi e vështirë, veçanërisht në Kosovë e Maqedoni. Megjithatë, edhe gjatë shtatë muajve të parë të këtij viti, databaza është zgjeruar ndjeshëm, me plot 101 anëtarë të testuar vetëm gjatë kësaj periudhe në kompani të ndryshme, pa llogaritur këtu rezultate të mëparshme që janë bashkuar rishtaz me projektin.

Nga 101 rezultate, 86 vijnë nga Shqipëria, 5 nga Kosova, 4 nga Maqedonia, 4 nga Mali i Zi dhe 2 nga Çamëria. Shpeshtia e haplogrupeve në këto rezultate është e ngjashme me kampionin e përgjithshëm: E-V13 mbetet haplogrupi më i shpeshtë (21 rezultate), i ndjekur nga R1b (20), J2b-L283 (19), I2a-Y3120 (9), R1a-M417 (9), J2a-M410 (8), I1-M253 (5), dhe haplogrupe të tjera nën 5%. Listën e plotë të rezultateve të reja mund ta gjeni në tabelën e mëposhtme, të renditura sipas qarkut/komunës.

Paraqitja e rezultateve të reja në formë përmbledhëse si këtu, do të vijojë në mënyrë të rregullt dy herë në vit. Në të njëjtën kohë, rezultatet do të shtohen pa ndërprerje në databazën publike, e cila do të përditësohet çdo muaj, njëkohësisht me faqen e statistikave.

Krahas 101 rezultateve që përmendëm, 31 anëtarë janë në pritje të përfundimit të analizës, kurse rreth 50-60 persona të tjerë presin të kryejnë testin gjatë gushtit dhe shtatorit. Presim që këto rezultate të bëjnë më të njëtrajtshme shpërndarjen gjeografike të testeve të këtij viti, pasi krahasuar me rezultatet e deritanishme, vijnë në masë më të madhe nga Kosova, Maqedonia, dhe disa krahina pothuajse të patestuara në Shqipëri. Për këto do të raportojmë me më shumë siguri në dhjetor. Duke uruar lehtësimin e gjendjes së pandemisë, shpresojmë që gjatë gjysmës së dytë të vitit të testohen edhe më shumë shqiptarë nga të gjitha trevat.